Acts 7

1SAMERO lapalap ap masani: I Melel mepukat? 2A masani: Ri ai o sam ai kan, komail ron, Kot en linan kotin pwara don sam atail Apraam ni a kotikot Mesopotamien, ni a saikenta kotikot Aran, 3O kotin masani on i: Kowei san nan sap om o san ren sau om, ko won eu sap, me I pan kasale on uk! 4I ap lipa san nan sap en Kaltiia o kotikot Aran. Sam a lao matalar, a kotin kalua won i sap wet, wasa komail kotikot ansau wet. 5I ari sota kotin mueid on i, en sapaneki sap o, sota wasa, me laude on pat en na eu, ap kotin inauki on i, ni ansau saikenta sapwilim a seri, me a pan kotiki on i o kadaudok a, en sapaneki. 6A iet duen me Kot kotin masani: Kadaudok a pan kakairu nan sap en men wai, o re pan lidula, o kanaudokala saunpar papuki. 7O Kot kotin masani: I pan kadeikada toun wei o, me re kin liduliduwi. A murin met re pan lipa san sap o, ap kaudok on ia sap wet. 8I ari kotiki on irail inau en sirkomsais. A ap wiadar Isaak o sirkomsais i ni ran kawalu, a Isaak wiadar Iakop, a Iakop sam atail ekriamen oko. 9A sam atail oko peirinki Iosep ap netikilan i Akipten. A Kot me kotin apwali i, 10O kotin dorela i san ni a apwal akan karos, o kotiki on I konekon on kupurokon mon Parao, nanmarki en Akipten. I ap kasapwilada i, en kaun en Akipten o a dipisou karos. 11Muein lek ap kipadi sap en Akipten karos o Kanaan; i ansau o me apwal melel, o sam atail akan sota diaradar sak ar kisin sak. 12A Iakop lao mani, me mana mi Akipten, ap kotin poronelar mas sam atail akan. 13A lao kariapak Iosep ap diarokadar ren ri a ol akan, o sau en Iosep sansaledo ren Parao. 14Iosep ap ilake don sam a Iakop, pwen kotilan re a o sau i kan karos, irail me isiakan limen. 15Iakop ap kotidilan Akipten o matalar, i o sam atail akan. 16Irail ari wisikelan Sikem o saredier nan sousou o, me Apraam netiekida moni kai san ren nain Emor oko, sam en Sikem. 17A ansau, me inau en Kot on Apraam pan pwaida, lao korendor, men Israel apkaparapar o totolar nan Akipten. 18A lao lel amen nanmarki kaunda Akipten, me sasa Iosep, 19I me widiwidina kainok atail oko, o wia sued on sam (atail) akan, pwe ren kasela nairail kisin seri kan, pwe re de memaurata. 20I ansau me Moses ipwidier, me seri kaselel amen, ap apapwalieta nan im en sam a saunipon silu. 21A lao lokidokilar, sapwilim en Parao seripein ap dorela i o kakairada dueta udan na. 22Moses ari padakeda ni son en lolekon en men Akipten karos; a i me manaman ni a masan o wiawia kan. 23A lao saunpar paeisok dauer poa, ap lamedar, en tu on ri a ol akan men Israel. 24A lao masani amen, me kalokolok mal, ap sauasa i o depuk on, me kaloke mal, ap kotin kamelar ol en Akipten. 25Pwe a kupura, me ri a ol akan pan dedeki, me Kot pan kotin kapiti kin ir san lim a; a re sota dedeki, 26A mandan ran o a kotila re ’rail ni ar akamai pena, ap men kotin kapol ira la, masani: Koma pirien eu, menda koma wia sapun nan pun oma? 27A me wiada sapun on men imp a o sikon wei i, inda: Is me kasapwil uk adar, pwen at saumas o saunkapun? 28Koe pan kame ia la dueta koe kamela men Akipten aio? 29Moses ap tanki san lokaia pot et o kakairu sili nan sap en Midian eu, wasa a kanaitikieda ol riamen. 30Kadekadeo lao par paeisok dauer poa, tounlan amen ap pwara don i ni nana Sinai nin tuka teketek umpumpul pot. 31Moses lao masani, ap kotin puriamuiki kasansal o. A ni a koti on, pwen masani, kapitie en Kaun o ap pei don i: 32Nai Kot en sam om akan, Kot en Apraam, o Isaak, o Iakop. Moses ap kotin rerereda o masak udial i. 33Kaun o ap kotin masani on i: Kisan sut ni na om akan, pwe wasa koe u ia me saraui! 34I kilaner kankaneraner en nai aramas akan, o I roner ar sanesan, ap kodi don kamaio wei ir ala. Ari kodo, I pan kadar uk alan Akipten! 35I Moses, me irail mamaleki ni ar indinda: Is me kasapwil uk ada, pwen at saumas o saunkapun? I me Kot kotin poronela, en saumas o saunkamaur ki lim en tounlan o, me kotin pwara don i nan tuka teketek. 36Iei i, me kalua ir san o wiadar manaman o kilel akan nan sap Akipten, o nan sed waitata, o nan sap tan saunpar paeisok. 37I Moses, me masani on men Israel: Kot pan kotiki on komail Saukop amen san nan ipwin ri omail ol akan dueta nai, i me komail en peiki on! 38Iei i, me mi nan momodisou nan sap tan ren tounlan o, me kotin mamasani on i pon nana Sinai, o me kotin ieian sam atail akan me kotin aleer masan en kamaur, pwen use don kit. 39Me sam atail akan kan peiki on, ap siken wei san irail i, o nan monion arail re men sapalan Akipten, 40Potoan on Aron: Wiai on kit at kot akan, me pan tion mo at, pwe se sasa, da me wiaui on Moses, me kalua kit san nan Akipten! 41Irail ari wiadar dikedik en kapul amen ni ran oko, o mairon on kilel en ani mal o, n perenki, wiawia kan en pa arail. 42Kot ap kotin saupei san irail o kotin mueid on irail ren kaudok on usu pan lan akan duen a intinidier nan puk en saukop akan: Iaduen komail men Israel, komail maironki on ia man akan nan sap tan ni par Paoisok? 43Melel komail waroki on mol on Molok, o usu en omail kot Rempan, dikedik kai, me komail wiadar, pwen poni; a I pan kasapoke komail la palila san Papilon. 44Mol en kadede mi ren sam atail akan nan sap tan duen masan en i, me kotin mamasani on Moses, me ren wiada duen kilel o, me a kotin udialer. 45Me sam atail akan pil aleer, ap ian Iosua wala ni ar sapaneki sap en men liki kan me Kot kotin koko wei mon silan en sam atail akan lao lei muein Dawid. 46Me konekon ren Kot o kotin anane kauadan Kot en Iakop mol eu. 47A Salomo me kotin kauada tanpas eu. 48A Wasa lapalap sota kin kotikot nan mol, me pa en aramas wiadar duen saukop o kin katitiki: 49Nanlan deu i, o sappa utipa i, me Kaun o kotin masani. A im da, me komail men kauadan ia, de ia wasa, I en kamol ia? 50Kaidin pa i, me wiadar mepukat karos? 51Komail me katiwo o so sirkomsais nan monion o salon omail, komail kin kaokaoe Nen saraui ansau karos, komail kin dueta sam omail akan. 52Is ren saukop akan me sam omail akan sota kaloke? O re kamata ir ala, me kopador Pun men et, me komail panalar o kamatalar. 53Komail me aleer kapun ren tounlan kan, ap sota kapwaiada. 54Irail ronadar mepukat, ap olar nan monion arail o re teterok ni on i. 55A Stepanus dir en Nen saraui kankakil nanlan o udial en Kot a linan o Iesus a kotikot ni pali maun en Kot, 56Ap katitiki: Kilan, i ududial nanlan kan ar ritida, o Nain aramas a kotikot ni pali maun en Kot. 57Irail ap weriwereda o pinale salon arail o wiaki eu tana don i. 58Irail lao sikenewei san nan kanim o, rap kate i. A saunkadede kan pwilikidier ar likau ni na en manakap amen, me ad a Saulus. 59Irail ari kate Stepanus ni a kapakap o inda: Main Iesus, re kotin kasamo nen i! 60I ari kelepuki o nil laudeda: Main re der kapokon on irail dip wet. A inda met, ap mairedi o ari.